Hindistanda 55 yaşlı Saripalli Venkatesvara adlı şəxs öz xoruzu tərəfindən öldürülüb.

Axar.az xəbər verir ki, tragikomik hadisə Andra Pradeş əyalətinin Praqadavaram kəndində baş verib.

Belə ki, təşkil edilən xoruz döyüşlərinin birində 55 yaşlı kişi yarışdan öncə rəqibinə ağır zərər verməsi üçün xoruzun ayağına kiçik bıçaq bağlayıb. Sahibi xoruzu döyüşməsi üçün səhnəyə buraxdıqda isə xoruz gözlənilmədən əks istiqamətə yönəlib və sahibinin üzərinə atılaraq, onu qarnından ağır yaralayaraq öldürüb.

Qeyd edək ki, Hindistanda xoruz döyüşləri qadağan olmasına baxmayaraq, yerli əhali arasında olduqca məşhurdur.