Avropa İran məsələsini BMT Təhlükəsizlik Şurasında müzakirəyə çıxararsa, biz də nüvə razılaşmasından çıxacağıq.

Axar.az xəbər verir ki, bunu İran Xarici İşlər naziri Məhəmməd Cavad Zərif deyib. O, İran Prezidenti Həsən Ruhaninin 2018-ci ildə Rusiya, Çin, İngiltərə, Fransa və Almaniya dövlət başçılarına sözügedən məsələ ilə bağlı məktub göndərdiyini xatırladıb:

“Avropalıların verdiyi açıqlamanın heç bir qanuni əsası yoxdur. Avropalılar başqa bir addım atarsa, İranın nüvə silahlarının yayılmasının qarşısının alınması razılaşmasından çıxması gündəmə gələcək. Nüvə razılaşmasındakı öhdəliklərin azaldılması ilə bağlı mərhələ başa çatıb. Əgər avropalılar qanuni əsası olmayan hərəkətlərinə davam edərsə və ya İran məsələsini BMT TŞ-da müzakirəyə çıxararsa, razılaşmadan çıxarıq”.

Qeyd edək ki, 14 yanvarda İngiltərə, Almaniya və Fransa (E3) nüvə müqaviləsinin şərtlərini yerinə yetirməmək ittihamı ilə İrana qarşı Mübahisələrin Həlli Mexanizmini (MHM) işlə salmaq barədə qərar verib.