Fransanın şərqində, Almaniya ilə sərhədin cəmi bir neçə kilometrliyində yerləşən Elzasda yüzlərlə məzar təhqir edilib. Hadisə Aşağı Reyn departamentinin Sarr-Yunion yaşayış məntəqəsində baş verib.

AzərTAc xəbər verir ki, bu barədə Fransanın daxili işlər naziri Bernar Kaznyov məlumat verib. Lakin o, məzarların necə təhqir edildiyini açıqlamayıb. İstintaq dairələrindən əldə olunan məlumata görə, naməlum şəxslər 400 məzardan təqribən 300-nə ziyan vurublar.

Yelisey Sarayının məlumatına görə, Fransa Prezidenti Fransua Olland bildirib ki, hakimiyyət orqanları "bu mənfur və vəhşi əmələ" görə məsuliyyət daşıyanların tezliklə tapılıb cəzalandırılması üçün mümkün olan hər şeyi edəcəklər.

Sarr-Yunionda yerləşən yəhudi məzarlığı daha əvvəl də təhqir edilib. 1988-ci ildə təqribən 60 başdaşı uçurdulub, 2001-ci ildə isə cinayətkarlar 54 məzarı dağıdıblar.