ABŞ BMT-nin Dünya Qida Proqramına suriyalılar üçün 125 milyon dollar vəsait ayırıb.

Axar.az xəbər verir ki, bu barədə Dövlət Departamentinin nümayəndəsi Kelli Klements BMT-nin Cenevrə ofisində təşkil olunan mətbuat konfransında məlumat verib. O, Suriyada davam edən müharibə nəticəsində 12,2 milyon insanın yardıma ehtiyacı olduğunu deyərək ölkəsinin indiyədək bu ölkəyə 3 milyard dollar vəsait xərclədiyini bildirib:

"Ediləcək yardımın 50 milyon dolları hazırda Suriyada yaşayan vətəndaşlara, 70 milyon dolları isə qonşu ölkələrə gedən suriyalılara xərclənəcək".

Xatırladaq ki, BMT-nin hesabatına görə, hazırda 12 milyon suriyalının yardıma ehtiyacı var. Ümumilikdə 7,6 milyon vətəndaş öz evindən didərgin düşüb. Onlardan 3,3 milyonu qonşu ölkələrə sığınıb.

Müharibə nəticəsində 220 min insan öldürülüb, 1 milyon insan isə yaralanıb.