10:35

Debaltsevo rayonunda amansız döyüşlər davam edir. Şəhəri bütünlüklə ələ almaq üçün rus-terrorçu komandanlığı bütün ehtiyat qüvvələrini sözügedən rayona göndərib.

Axar.az xəbər verir ki, bu barədə ukraynalı hərbi ekspert Dmitri Tımçuk məlumat verib.

"Yerli separatçılar və rus muzdluları, eləcə də hərbi texnikanın cəmləşdiyi Staxanov rayonundan fevralın 18-də 300 piyada, 2 BM-21 "Qrad", 1 minaatan batareyası Debaltsevoya göndərilib. Qorlovkada da separatçıların bütün hərbi qüvvələri (11 tank və 5 zirehli döyüş maşını) Debaltsevoya yollanıb", - Tımçuk deyib.

Onun sözlərinə görə, Donetskdən Yanakiyevoya separatçıların yardımına 300 piyada, 4 tank, 2 ZU-23-2, 3 D-30, 2 PDM, 2 BTR-80 və 4 yük maşını göndərilib.

Tımçuk bildirib ki, həmin qüvvələr Donetskin 2 rayonu – Petrovski və Kuybışevə Debaltsevoya hücuma keçmək üçün toplanıb.

***

Rus-separatçı qoşunlarının taktiki zərbə qrupu Uqleqorsk və Debaltsevo istiqamətində hücuma keçib.

Bu barədə ukraynalı hərbi ekspert Dmitri Tımçuk özünün Feysbuk səhifəsində yazıb.

"Düşmən 3 artilleriya diviziyasının (40 top və 12 reaktiv yaylım atəş sistemi) atəş dəstəyilə 25 tank və 35 zirehli döyüş maşınını hücuma göndərib. Nəticədə separatçılar şəhərə daxil olaraq, şərqi və mərkəzi hissədə küçə döyüşlərinə başlayıb", - Tımçuk bildirib.

Onun sözlərinə görə, düşmən Debaltsevo ilə Artyomovsk arasındakı yola nəzarəti davam etdirir.