Əfqanıstanda qəzaya uğrayan təyyarədə olan hərbçilərdən ikisinin meyiti və həmçinin təyyarənin qara qutusu tapılıb.

Axar.az xəbər verir ki, bu barədə ABŞ Hərbi Qüvvələrinin polkovniki Sonni Leccet deyib.

“ABŞ məxsus Bombardier E-11A təyyarənin qəzaya uğradığı Əfqanıstanın Qəzni əyalətində iki hərbçinin qalıqları və qara qutusu aşkarlanıb. Fəlakətin səbəbləri araşdılır. Təyyarənin vurularaq yerə salınması ilə bağlı hələ ki dəlil yoxdur”, - deyə polkovnik bildirib.

Leccet qalıqların qəza yerinin yaxınlığında tapıldığını və yerli əfqan ictimaiyyətinin onlarla nəzakətlə davrandığını əlavə edib.

Qeyd edək ki, taliblər təyyarəni vurduqlarını açıqlamışdı. Təyyarə göyərtəsindəki 83 nəfərin olduğu iddia edilsə də, ABŞ mediası Pentaqona yaxın mənbələrə istinadla təyyarədə 10-dək hərbçinin olduğu haqda məlumat yayıb.