Litva Prezidenti Dalya Qribauskayte Avropa Birliyi ölkələrinin liderləri ilə fevralın 22-də Maydan hadisələrinin ildönümü münasibətilə Ukraynaya səfər edəcək.

Axar.az xəbər verir ki, Qribauskayte bu barədə Delfi agentliyinə verdiyi müsahibəsində deyib.

"Mən Pyotr Poroşenko ilə görüşəcəm. Orada Polşa Prezidenti Bronislav Komorovski, Latviya Prezidenti Andris Berzinış, Avropa Şurasının sədri Donald Tusk, eləcə də digər ölkələrin rəhbərləri tədbirlərdə iştirak edəcək", - Qribauskayte deyib.

Onun sözlərinə görə, Kiyevdəki görüş Donbas hadisələri barədə növbəti dəfə müzakirə aparmaq imkanı verəcək.

Litva prezidenti bildirib ki, Rusiya və onun dəstəklədiyi separatçılar Minsk razılaşmasına əməl etmir və buna görə də Qərb Kremlə qarşı sanksiyaları gücləndirməlidir.