Böyük Britaniyanın keçmiş baş naziri Toni Bler Serbiyanın Baş naziri Aleksandr Vuçiçin məsləhətçisi olub.

Axar.az xəbər verir ki, bu barədə informasiyanı "Qardian" qəzeti yayıb.

Qəzet hazırda Blerin konsaltinq şirkətini Birləşmiş Ərəb Əmirliklərinin maliyyələşdirdiyini bildirib. Məhz ərəblər tərəfindən maliyyələşən bu şirkətin Belqrada məsləhətlər verdiyi deyilir. "Qardian"ın Serbiyadakı mənbələri də keçmiş baş nazirin ölkəyə tez-tez gəldiyini söyləyiblər.

Qeyd edək ki, Toni Bler 1997-2007-ci illərdə Böyük Britaniyanın baş naziri olub. Sonradan özünün də dediyi kimi, məhz o, 1999-cu ildə NATO-nun keçmiş Yuqoslaviyaya hərbi müdaxiləsində mühüm rol oynayıb. Keçmiş baş nazir həmçinin Qərbin İraq və Əfqanıstandakı əməliyyatlarının kəskin dəstəkçisi olub.

Onu da xatırladaq ki, Toni Bler 2011-ci ildə Qazaxıstan Prezidenti Nursultan Nazarbayevin iqtisadi məsələlər üzrə məsləhətçisi olmuşdu.