Ölkədə topdan qida satışı ilə məşğul olan şirkətlər nağd satışa keçib.

Axar.az-a daxil olan məlumata görə, qida sektorunda qabaqcıl şirkətlərdən sayılan "Veysəloğlu" firması artıq məhsullarını nağd şəkildə satmağa başlayıb. Ərzaq ticarəti ilə məşğul olan satıcılar deyir ki, şirkət yeni qaydanı bu gündən etibarən tətbiq edib:

"Əvvəllər mal gətirilirdi və bir ay ərzində məhsulun pulu ödənilirdi. Lakin bu gündən etibarən şirkət yeni qaydaya keçib. Satış nümayəndələri məhsulun pulunu öncədən tələb edir".

Bildirək ki, yeni qaydalar bununla bitmir. Satıcıların sözlərinə görə, məhsul həm də dolayısı ilə faizlə satılır:

"Hazırda çox az mağaza ola bilər ki, nağd alışa üstünlük versin. Ona görə də şirkət nümayəndələri qarşımızda iki şərt qoyub. Ya məhsullar nağd qiymətə alınmalı, ya da ayın sonunda 20 faiz artıq pul ödənilməlidir. Bu, qanunsuzluqdur. Topdan satış şirkətlərinin bu addımı da ərzaq qiymətlərinin artmasına səbəb olacaq".

Xatırladaq ki, manatın ucuzlaşmasından sui-istifadə hallarının qarşısını almaq üçün İqtisadi İnkişaf Nazirliyi sabahdan reydlərə başlayacaq.