Avstriya 3 ildir ölkədə müzakirələrə səbəb olan "İslam qanun layihəsi"ni məclisdən keçirərək qanuniləşdirib.

Axar.az xəbər verir ki, müftilərin Avstriyada təhsil almasını nəzərdə tutan qanun, həmçinin məscidlərin xaricdən maliyyələşməsinə də son qoyacaq.

Sosial Demokrat Partiyası (SPÖ) və Avstriya Xalq Partiyasının (ÖVP) yaratdığı koalisiya hökuməti tərəfindən hazırlanan qanunun, başda Almaniya olmaqla bütün Avropaya yayılması gözlənilir. Avstriya Xarici İşlər naziri Sebastian Kurz İslami dərnəklərin və məscidlərin xaricdən maliyyələşməsinə son qoyan qanunun Avropa ölkələrinin islamla bağlı qanunlarına zəmin yarada biləcəyini deyib.

Avstriyadakı İslam cəmiyyətləri uzun müzakirələrdən sonra bu qanunu təsdiq etsə də, ölkədəki müsəlman gənclərin böyük qismi yeni qanuna qarşı çıxıb. Müsəlmanların Avstriyada ən güclü təmsilçisi sayılan Türk İslam Birliyi qanunun ləğv edilməsi üçün konstitusiya məhkəməsinə müraciət edəcəyini elan edib.