AKP-çi millət vəkili Tülay Babuşçunun Tvitterdə Türkiyənin qurucularından İsmət İnönü ilə bağlı paylaşdığı mesaj ölkədə səs-küyə səbəb olub.

Axar.az xəbər verir ki, millət vəkili Türkiyənin Suriyadakı Süleyman Şah türbəsinin yerinin dəyişdirilməsi ilə bağlı təşkil etdiyi əməliyyatı torpaq itkisi kimi qiymətləndirənlərə cavab verib. O, 1923-cü ildə imzalanmış Lozanna sülh müqaviləsinin şərtlərini xatırladıb və bunun əsil torpaq itkisi olduğunu bildirib:

"Masa arxasında torpağın necə itirildiyini içimizdəki xainlərə izah edək. Lozanna sülh müqaviləsinin 129-cu maddəsinə görə, Türkiyənin Anzak (Arıburnu) bölgəsindəki torpağı İngiltərəyə verildi. Bəli, uğrunda 253 min insanın şəhid olduğu torpaq İsmət İnönü tərəfindən İngiltərəyə hədiyyə olundu".

Millət vəkili bundan da ağır ifadələrlə İsmət İnönüyə ünvanladığı təhqirə görə parlamentdə üzr istəmək məcburiyyətində qalıb.

Xatırladaq ki, Türkiyə fevralın 22-də Süleyman Şah türbəsinin təxliyyəsi üçün Suriyaya qoşun yeridib. Türkiyənin keçirdiyi əməliyyatda 700 nəfər türk hərbçisi iştirak edib. Türkiyə rəhbərliyinin bu addımı ölkədə millətçilər tərəfindən torpaq itkisi kimi qiymətləndirilib.