Türkiyə Prezidenti Rəcəb Tayyib Ərdoğan üçün tampon bölgənin qorunmasını təmin etmək önəmli idi.

Axar.az xəbər verir ki, bunu Sputnik-ə Türkiyə Prezidenti Ərdoğanla Rusiya lideri Vladimir Putinin Moskvada baş tutan zirvə görüşünü şərh edən rusiyalı siyasi ekspert Nikolay Surko deyib.

O bildirib ki, əldə edilən razılığın reallaşdırılmasında həm Türkiyənin, həm Rusiyanın, həm də Suriyanın siyasi iradəsinin böyük rolu var:

"Tərəflər siyasi iradə göstərsə və razılığa həqiqətən də əməl edilsə, kifayət qədər uzunmüddətli atəşkəsi və vəziyyətin hazırda olduğu kimi qalmasını müşahidə edə bilərik. Suriya bu maddələrə ciddi şəkildə riayət edəcək. Çünki gərginliyin davam etməsini istəməzlər".

Ekspert İdlibdəki radikal meyilli təşkilatların məhv edilməsi üçün Türkiyənin bu məsələdə əməkdaşlıq etməsinin lazım olduğunu qeyd edib:

"Müəyyən edilmiş siyasət davam edərsə və qarşılıqlı anlaşma olarsa, bu, həll edilə biləcək məsələdir. Hər şey siyasi iradədən və bəzi güzəştlərə getməkdən asılıdır. Mühüm məqam isə Rusiyanın bu məsələyə hazır olmasıdır".