İran İslam Respublikasının qurucusu Ayətullah Xomeyninin ailəsinə mənsub saytlar İran təhlükəsizlik qrupları tərəfindən bağlanıb.

Axar.az xəbər verir ki, İranın yarı-rəsmi Fars Xəbər Agentliyinə görə, eks-prezident Məhəmməd Hatəminin görüntülərinin yer aldığı bir xəbəri yayımladığı üçün İran İslam Respublikasının qurucusu Ayətullah Xomeyninin nəvəsi Huccətul-İslam Seyid Həsən Xomeyniyə məxsus xəbərləri çap edən "jamaran.ir" və ölkədəki "reformist" hərəkatın liderlərindən Məhəmməd Rza Arifə məxsus "baharnews.ir" xəbər saytına giriş qadağan edilib.

Qeyd edək ki, keçən həftə İran Prokurorluğu müxalif mövqeyi ilə tanınan keçmiş prezident Məhəmməd Hatəminin "fitnə öndərlərindən" olduğu iddiası ilə mediada adının hallanması, foto və videolarının yayınlanmasının qadağan edildiyini, bu qadağaya uymayan media orqanlarının cəzalandırılacağını açıqlamışdı.