İraq ordusu "İslam dövləti"nin işğalında olan Səddam Hüseynin doğma Tikrit şəhərində hərbi əməliyyata başlayıb.

Axar.az-ın xəbərinə görə, bu barədə ölkənin dövlət televiziyası məlumat yayıb. Yerli media şəhər üzərinə hava qüvvələrinin dəstəyi ilə hücumların keçirildiyini bildirir.

İD paytaxt Bağdaddan 150 kilometr şimala doğru yerləşən Tikrit şəhərini iyun ayında zəbt edib. Hücumdan əvvəl İraqın baş naziri şəhərin yerləşdiyi Səlahəddin vilayətində hökumət qüvvələrinin hərbçilərilə görüşüb.

Heydər əl-Abadi İD-ni tərk edən yerli sünni tayfaları döyüşçülərinin əfv olunacağını deyib. O, şəhərin tezliklə öz sakinlərinə qaytarılacağını bəyan edib. İD döyüşçüləri əsasən sünni müsəlmanların yaşadığı Səlahəddin vilayətində bir neçə bölgəyə nəzarət edirlər.

Tikrit üzərinə əməliyyatda hökumət qüvvələrinin əsgərləri ilə müttəfiq şiə döyüşçüləri iştirak edirlər. Onların həmlələri koalisiya qüvvələrinin hava zərbələri ilə müşayiət olunur. Eyni zamanda kürdlərin peşmərgə qüvvələri İD nəzarətində olan mühüm Mosul şəhərinə doğru irəliləyirlər.