Əhməd Qəzzafi İngiltərənin "Daily Mail" qəzetinə müsahibə verib.

Axar.az Türkiyə mediasına istinadən yazır ki, Liviyanın keçmiş lideri Müəmmər Qəzzafinin əmisi oğlu olan Əhməd Qəzzafi əl-Dam 2011-ci ildən bəri Misirin Qahirə şəhərində yaşayır. Ə.Qəzzafi Liviyadan Avropaya mühacirət edənlərə diqqət çəkərək köçənlərin arasında çoxlu terrorçu olduğunu söyləyib. O, "hər min nəfərdən 50 nəfəri terroçudur," - deyə bildirib.

Liviyanı tərk edən "cihadçı"ların getdikləri Avropa ölkələrində hücumlar həyata keçirəcəyini vurğulayan Qəzzafi miqrantların sayının yarım milyona yaxınlaşdığını deyib:

"Terrorçular Avropaya köç edir. Bir və ya iki ilə başqa bir "11 Sentyabr" hadisəsi baş verəcək".

İŞİD-in son həftələrdə Liviyada möhkəmlədiyini qeyd edən Qəzzafi terror təşkilatının 6 min barreldən çox urana sahib olduğunu və bu uranı sataraq böyük məbləğlərdə qazanc əldə etdiyini irəli sürüb.