Argentinanın paytaxtı Buenos Ayresin 1170 kilometr şimal-qərbindəki La Rioja vilayətində yerləşən Villa Kastelli bölgəsində Fransız TF1 kanalının "Sağ qalma" proqramı "Dropped"in çəkilişləri vaxtı iki vertolyot toqquşub.

Axar.az xəbər verir ki, iki vertolyotun toqquşması nəticəsində üçü fransız idmançı olmaqla 10 nəfər həlak olub. Ümumilikdə 8 fransız vətəndaşı ilə 2 argentinalı pilot həlak olub.

Ölən fransızlar arasında peşəkar üzgüçü Florens Arthod, olimpiya üzgüçüsü Kemil Muffat və olimpiya boksçusu Aleksis Vestin də var. Kemil Muffat 2012-ci il London Olimpiadalarında 3 medal qazanıb. Aleksis Vestin də 2008-ci il Pekin Olimpiada Oyunlarında bürünc medal sahibi olub.

Qəzanın baş verdiyi vaxt bölgədə havanın yaxşı olduğunu bildirən səlahiyyətli şəxslər bir partlayış səsi eşidildiyini, vertolyotların havada toqquşduğunu və yerə çırpıldığını bildirib. Qəzanın başvermə səbəbləri araşdırılır.