Rusiya Xarici İşlər Nazirliyi və digər idarələr bütün lazımi addımları atırlar ki, II Dünya savaşının nəticələrinin yenidən nəzərdən keçirilməsinə imkan verməsinlər.

Axar.az xəbər verir ki, bunu Rusiya Xarici İşlər naziri Sergey Lavrov deyib.

O, bu mövqeyi Rusiya ilə bərabər dünya ictimaiyyətnin böyük əksəriyyətinin dəstəklədiyini bildirib:

“Faşizm üzərində qələbədə həlledici rolu SSRİ-nin bütün xalqları oynayıb. Bu epoxal hadisənin bütün insanlıq üçün əhəmiyyətini qiymətləndirmək çətindir. Bu gün biz vacib olan hər şeyi etməliyik ki, gənclik milli eqoizmin, istənilən cür şovinizm və ksenofobiyanın nəyə gətirib çıxardığını unutmasın. Təəssüf ki, biz tarixin yenidən yazılması cəhdləri ilə toqquşmağa davam edirik. Bizim nazirlik və digər idarələr lazım olan hər şeyi edirlər ki, bu destruktiv fikirlərə müqavimət göstərsinlər və II Dünya savaşının beynəlxalq hüquqi nəticələrini, o cümlədən Nürnberq tribunalının nəticələrini yenidən nəzərdən keçirməyə imkan verməsinlər. Dünya ictimaiyyətinin əksəriyyəti bu mövqedədir”, – deyə o bildirib.