"Son zamanlar Türkiyə-Suriya gərginliyi Yaxın Şərqin ən çox diqqət mərkəzində olan mövzulardan biridir".

Bu sözləri Axar.az-a açıqlamasında analitik Vüqar Zifəroğlu Türkiyədə bu il baş tutacaq seçki öncəsi Suriyanın bu ölkədə qarışıqlıq yaradacağı ilə bağlı yayılan iddialara aydınlıq gətirərkən deyib.

Sözügedən iddialarla bağlı məsələni şərh edən analitik bunun istisna olmayacağını da diqqətə çatdırıb:

"Bəli, bunu istisna etmək olmaz. Ümumiyyətlə nəzərə alsaq ki, AKP hökuməti Əsəd rejiminin getməsində maraqlı olduğunu dəfələrlə bəyan edib. Hətta müxalifətə açıq şəkildə dəstək də verilib. Belə olan təqdirdə Əsədin bu cür addımla Türkiyənin daxilini qarışdırmağa cəhd göstərəcəyini istisna etmək olmaz. Onsuz da son "Şah Fırat" əməliyyatı ilə hər iki ölkənin münasibətlərində ciddi gərginlik müşahidə edildi. Amma önəmli bir nüansı da qeyd etmək lazımdır. Suriya buna gedərmi? Məsələ burasındadır ki, Əsəd rejimi hazırkı vəziyyətdə bu qədər ehtiyatsız tərpənməklə açıq müstəvidə qarşıdurmaya getməz".

Xatırladaq ki, Türkiyə kəşfiyyatı Əsəd rejiminin bu il iyunda baş tutacaq seçkilərə maneə olmaq və Türkiyədə xaos yaratmaq üçün xüsusi planlar hazırlamasına dair məlumat yayıb və Türkiyənin güc strukturları artıq Suriya ilə sərhəddə təhlükəsizlik tədbirlərini gücləndirmək istiqamətində addımlar atıb.