Ukrayna qumda oynayan və ətrafında alovların ucaldığı uşağı xatırladır.

Axar.az xəbər verir ki, bu sözləri Mixail Saakaşvili Ukraynanın iqtisadi vəziyyətini şərh edərkən deyib.

“Uşaq düşünür ki, ata və ana gəlib onu götürəcək. Ata və ana isə yoxdur. Böyüməliyik”, - deyə Saakaşvili bildirib.

Gürcü siyasətçi eyni zamanda əlavə edib ki, koronavirus pandemiyası səbəbindən Ukrayna iqtisadiyyatı daha ağır vəziyyətə düşüb.

Xatırladaq ki, 22 apreldə Saakaşvili Prezident Vladimir Zelenskidən Baş nazirin müavini vəzifəsini icra etmək təklifi aldığını bildirmişdi. Aprelin 24-dən isə Saakaşvili Xalqın Xidmətçisi Partiyasının deputatları ilə görüşlərə başladı. Mediada yayılan məlumatlara görə, danışıqlardan sonra Saakaşvilinin təyin olunması üçün təxminən 140-170 arası səs toplanıb. Bu isə Baş nazir müavininin təsdiqlənməsi üçün kifayət deyil.

Bundan sonra Ukrayna Nazirlər Kabineti Ali Radadan Mixail Saakaşvilinin Baş nazirin müavini təyin edilməsi ilə bağlı təqdimatı geri götürüb.

Saakaşviliyə Milli İslahatlar Şurasında təmsil olunmaq təklif edilib.