Ukraynanın Patrul Xidməti Polisinin xüsusi təyinatlı “Luqansk-1” taborunun komandiri Sergey Qubanov Ukraynanın Luqansk vilayətində tapşırıq icra edərkən həlak olub.

Axar.az Teleqraf.com-a istinadən xəbər verir ki, bu barədə Ukrayna Daxili İşlər Nazirliyinin mətbuat xidmətindən bildirilib.

“Mayın 20-də Luqanşinedə tabor komandiri Sergey Qubanov həlak olub”, – deyə məlumatda bildirilib.

Qeyd edilir ki, tapşırığın icrası zamanı S.Qubanov və taborun 3 döyüşçüsü ağır qəlpə yaraları alıb. Hərbi hospitalın həkimləri onlara tibbi yardım göstərib. Onlardan yalnız S.Qubanovun həyatını xilas etmək mümkün olmayıb.

“Hər şey dünən, mayın 20-də saat 21:30 radələrində Novoaydar rayonu, Tryoxizbenka kəndi yaxınlığında baş verib”, – deyə məlumatda bildirilib.

Hazırda hadisənin başvermə şəraiti öyrənilir.

Qeyd edək ki, Sergey Qubanov hələ 2014-cü ildə – Donbasda müharibənin lap başlanğıcında qondarma Luqansk xalq respublikasının ərazisini tərk edərək Ukraynaya xidmət etmək və ukraynalıları qorumaq yolunu seçmişdi.