Anakara və Şimali Kipr rəhbərliyi Maraş şəhərinin yenidən açılması ilə bağlı işləri sürətləndirib.

Axar.az xəbər verir ki, artıq 46 ildir bağlı olan şəhərin fəaliyyətə keçməsi üçün “Yol xəritəsi” açıqlanıb.

Məsələ ilə bağlı danışan Şimali Kiprin Baş naziri Ərsin Tatar Maraş üçün qətiyyətli mövqe sərgiləyəcəklərini bildirib:

“Türkiyə ilə əməkdaşlıq çərçivəsində bütün qərarlar gecikmədən həyata keçiriləcək. Maraşın ən qısa müddətdə açılması üçün Xarici İşlər Nazirliyinin başlatdığı işlər davam etdiriləcək və bu işlərə dəstək olmaq üçün Nazirlər Kabineti daxilində həm mütəxəssis, həm də bürokratlardan ibarət komissiya yaradılacaq. Şimali Kipr yeni bir Sinqapur ola bilər.

Türkiyənin Şimali Kiprin Sinqapur olması üçün irəli sürdüyü fikirlər çox dəyərlidir”.

Qeyd edək ki, Maraş bölgəsi Kipr Sülh Hərəkatından sonra Şimali Kipr tərəfindən hərbi bölgə elan edilib və təhlükəsizlik üçün ərazidə yaşayan əhali təxliyə olunub. Maraş bir vaxtlar “Kabus şəhər” kimi də tanınıb.