Hollivudun məşhur aktisası Ancelina Colinin yumurtalıqları və uşaqlıq borusu çıxarılıb.

Axar.az yazır ki, məşhur ulduz xərçəng xəstəliyinin qarşısının alınması üçün buna getməyə məcbur olub. Colinin əməliyyatı isə o deməkdir ki, onda klimaks başlayacaq və o, hormonlarla müalicə olunacaq.

Nyu Yorkdakı Memorial Sloan Ketterinq Xərçəng Mərkəzindən onkoloq Keral Braun "Amerikanın səsi" radiosuna deyib ki, Coli üzərində aparılan əməliyyat bir mesajdır: "Fikrimcə, Coli bu addımla ailəsində xərçəng xəstəliyi olmuş və bu xəstəliyin ola biləcəyindən şübhələnilən qadınlara çatdırmaq, həmin qadınlara belə bir ciddi məsələdə qərar qəbul etməyin vacib olduğunu bildirmək istəyir".

Makmillan Xərçəng Mərkəzindən doktor Fran Vudard isə deyib ki, bütün qadınlar erkən diaqnostikanın vacibliyini başa düşməlidirlər:

"Xatırlamaq lazımdır ki, xərçəng sadəcə bizim tutulduğumuz və bundan öldüyümüz xəstəlik deyil. Bu, mürəkkəbdir. Çox sayda adamlar bundan qurtula bilir".