Rusiyanın Maliyyə naziri Anton Siluanov ölkəsinin "Holland sindromu"ndan qurtulduğunu açıqlayıb.

Axar.az xəbər verir ki, nazir iqtisadiyyatın tək bir sektordan asılılığı kimi qiymətləndirilən bu tendensiyanın bitdiyini elan edib. Neft-qaz sənayesində investisiyaların azalmağa başladığını deyən Siluanov iqtisadi durumun getdikcə yaxşılaşdığını açıqlayıb:

"Neft sektorunda investisiya azalıb. Lakin kənd təsərrüfatına ciddi maraq var. Bu, çox doğru bir addımdır. 2015-ci ilin büdcə investisiya planlaşdırılması 246 milyard rubl (4,2 milyard dollar) azaldı. Bu, birbaşa iqtisadi artıma təsir etməyəcək".

Siluanova görə, böhranla mübarizə tədbirlərinin həyata keçirilməsi reallaşarsa, 2015-ci ildə ölkə iqtisadiyyatı əvvəlki vəziyyətinə qayıda bilər:

"Rusiyada qiymətlərin aşağı olması bəzi ölkələrin marağına səbəb olub. Valyutanın sabitliyi təmin olunarsa, digər sahələrdə inkişaf reallaşacaq".

Məlumat üçün bildirək ki, "Holland sindromu" bir sahədə sürətli inkişaf səbəbindən iqtisadiyyatın digər sahələrinin həmin sahəyə yönəlməsi və ümumi inkişafın geriləmə ilə xarakterizə olunmasıdır. 60-cı illərdə Hollandiya iqtisadiyyatı bənzər problemlə qarşılaşıb.