Şiələrdən ibarət "Bədr" briqadasının komandiri Hadi Əmiri İraqda hərbi əməliyyatlar üçün heç kimdən icazə almaq niyyətində olmadıqlarını açıqlayıb.

Axar.az xəbər verir ki, komandan Mosul və Kərkükün cənubunda İŞİD-ə qarşı döyüşən şiə ordusunun əməliyyatları davam etdirəcəyini bildirib.

Rudav-a danışan Əmiri İran İslam İnqilabı Keşikçiləri Korpusunun komandiri, general Qasım Süleymani haqda gəzən söz-söhbətlərə də cavab verərək iranlı generalın müvəqqəti Tehrana getdiyini, ölkəni birdəfəlik tərk etmədiyini açıqlayıb:

"Qasım Süleymani işlərinə görə Tehrandadır və çox məşğuldur. Bütün vaxtını İraqda keçirmir. Ancaq lazımi vaxtda burada hazır olur. İŞİD-ə qarşı çətin vəziyyətdə köməyimizə çatıb. Onun buradan getməsinin ABŞ-ın Tikrit əməliyyatı ilə heç bir əlaqəsi yoxdur. Lazım olan vaxt Süleymani geri gələcək".

Xatırladaq ki, ABŞ Mərkəz Qüvvələrinin (CENTCOM) komandiri general Lloyd Austin Tikritdə İŞİD-ə qarşı hava əməliyyatlarına başlamaq üçün şiə qüvvələrinin geri çəkilməsini və şəhəri tərk etməsini tələb etmişdi.

Məlumat üçün bldirək ki, şiə qüvvələrinin ümumi sayı 100 mini keçir və İraq hökuməti tərəfindən maliyyələşdirilir.