Türkiyə Prezidenti Rəcəb Tayyib Ərdoğanın İran səfəri ərəfəsində Tehran rəsmiləri bu səfərə qalmaqallı münasibət bildiriblər.

Axar.az xəbər verir ki, İran Məclisinin Milli Təhlükəsizlik və Xarici Siyasət Komissiyasının sözçüsü Hüseyn Nakavi Hüseyni Ərdoğanın səfərini pisləyib:

"Ölkəni aşağılayan birisinin ayaqlarının altına qırmızı xalça sərmək diplomatiyamız üçün utancvericidir. Hökumət Ərdoğanın İrana qarşı dediyi sözlərdən sonra bu səfərin reallaşmasına icazə verməməli idi. Səfər ləğv edilməli, yaxud ertələnməli idi".

Bildirək ki, daha öncə İran məclisindən bir qrup millət vəkili Ərdoğanın İrana qarşı işlətdiyi ifadələri tənqid edərək Prezidenti Həsən Ruhanidən Ərdoğana xəbərdarlıq edilməsini tələb etsə də, ölkə rəhbərliyi gərginliyin yaranmasından ehtiyat etmişdi.

Xatırladaq ki, Çankaya köşkünün rəhbəri France 24 kanalına müsahibəsi zamanı İranın Yəmənə dəstəyinin dayandırmasının vacib olduğunu vurğulayaraq, "İran və terrorçu qruplar (Yəməndən) çəkilməlidir. İran Mosulda İŞİD-in yerini almamalıdır", - deyərək Tehranın bölgədə yürütdüyü siyasəti tənqid etmişdi.

Ərdoğanın bu çıxışından sonra demək olar ki, hər gün Tehrandan sərt bəyanatlar gəlməkdədir. "Gəlmə" çağırışlarına baxmayaraq, Türkiyə prezidenti bu gün səhər yerli vaxtla 08:07-də Tehrana səfər edib.

4 illik fasilədən sonra baş tutan səfər zamanı Türkiyə-İran Yüksək Səviyyəli Əməkdaşlıq Şurasının ikinci toplantısı keçiriləcək.