İsrailin silah istehsal edən şirkətləri gizli olaraq İrana hərbi təyyarə hissələri satıblar.

Axar.az xəbər verir ki, bu barədə informasiya Amerikanın "Homeland Security" təşkilatının hesabatında yer alıb.

Təşkilatın hesabatına görə, İsrail şirkətləri bu tip fəaliyyətə 2012-ci ildən başlayıblar. Məhz bu tarixdən etibarən rəsmi Tehrana müxtəlif növ silahlar verilib. Təl-Əvivin fəaliyyətindən ilk xəbər tutan isə Yunanıstan olub. Məhz Afinanın Vaşinqtona müraciətindən sonra Mərkəzi Kəşfiyyat İdarəsi (CİA) və "Homeland Security" araşdırmaya başlayıblar.

Qeyd edək ki, İranla Altılıq arasında razılaşma əldə olunmazdan əvvəl də İsrailin İrana silah verməsi haqqında müəyyən informasiyalar yayılmışdı. Lakin heç bir zaman Qərbdə yerləşən hakimiyyət orqanlarından biri İsrailə qarşı bu cür mühüm suçlamalarla çıxış etməmişdi.

Onu da xatırladaq ki, "Homeland Security" 11 sentyabr hadisələrindən sonra ABŞ-da yaradılıb. O, əsasən ölkənin daxili təhlükəsizliyinə nəzarət edir.