İstanbulun Atatürk hava limanında İranın "Qeshm" hava yollarına aid təyyarə yanıb.

Axar.az xəbər verir ki, bu barədə Türkiyənin "Sabah" qəzeti məlumat yayıb.

"Airbus-300B4" təyyarəsinin sağ motoru uçuş zolağından havaya qalxan zaman partlayıb. Pilot təyyarəni saxlamağa müvəffəq olub.

Hadisə yerinə bir neçə yanğınsöndürən maşın, xilasedici və tibbi briqada göndərilib.

Sərnişinlər arasında xəsarət alan yoxdur. Onlar aeroportun gözləmə zalına aparılıb və bir müddət sonra başqa bir reyslə Tehrana yola salınıblar.