"Qazprom"un sədri Aleksey Miller "Türk axını"na mane olmaq üçün Rusiya qazının Ukrayna üzərindən keçməsinə çalışan Avropa ölkələrinə xəbərdarlıq edib.

Axar.az Sputnik-ə istinadən xəbər verir ki, Miller bu sözləri "Valday" beynəlxalq diskussiya klubunda çıxışı zamanı deyib. Onun sözlərinə görə, Avropa ölkələri "Türk axını"na mane olarsa, Avropaya qaz nəqli birdəfəlik dayandırıla bilər:

"Cənub axını" layihəsinin əngəllənməsində əsas məqsəd yalnız Ukrayna üzərindən enerji daşınmasını təmin etmək idi. Bəziləri "Türk axını"nı da blok etməyi düşünürsə, böyük səhv etmiş olur. Ukrayna ilə tranzit anlaşması 2019-cu ildə sona çatacaq. Bundan sonra isə "Qazprom" "Türk axını" vasitəsilə nəqli davam etdirəcək. Bizim rəqabətdəki üstünlüyümüz ondan ibarətdir ki, məcbur olsaq, fasilə verə bilərik. Bu fasiləni də istədiyimiz qədər uzada bilərik".

"Qazprom"un Avropa strategiyasından çıxaraq Avrasiya strategiyasına keçdiyini deyən Miller gələcəkdə qiymətin Asiyada müəyyənləşəcəyini deyib:

"Strateji planımız ani deyil, uzunmüddətli işimizin bir nəticəsidir. Önümüzdəki 10 ildə Avropa bazarındakı qiymət meyarı Asiya bazarı ilə eyni olacaq".