Rusiyanın Xarici İşlər naziri Sergey Lavrov İrana göndərilən S-300 müdafiə sistemlərinin Yaxın Şərq üçün təhlükəsiz olduğunu açıqlayıb.

Axar.az xəbər verir ki, Moskvanın baş diplomatı İsrailin məlum narahatlığını xatırladaraq buna əsas olmadığını deyib:

"Çox qarmaqarışıq Yaxın Şərq bölgəsində yerləşən İran üçün müasir müdafiə sistemləri əhəmiyyətlidir. Xüsusilə hazırda Yəməndəki qarşıdurmalar fonunda çevrə getdikcə daralır".

Rusiyanın daha öncə imzaladığı razılaşmanı öz istəyi ilə təxirə saldığını deyən Lavrov mübadilənin dayanmasının Moskvaya ziyan verdiyini gizlətməyib:

"Bu, BMT Təhlükəsizlik Şurasının 1929 nömrəli qərarı, ya da digər bir qərar ilə təxirə salınmayıb. Bu addım 2010-cu ilin sentyabrında İranın nüvə probleminin həlli üçün P-6-nın aldığı qərara dəstək vermək üçün atılıb. Biz bunun daha uzun müddət davam etməsinin əleyhinəyik".