"Papanı qınayır və xəbərdarlıq edirəm, yəqin ki, bu cür səhvlər bir daha etməz".

Axar.az xəbər verir ki, bu sözləri Türkiyə Prezidenti Rəcəb Tayyib Ərdoğan bildirib.

"Bir məsələyə toxunmaq məcburiyyətindəyəm. Papanın ermənilərin yüz il əvvəl müsəlmanlar başda olmaqla, regionumuzdakı hər kəslə birlikdə yaşadıqları acıları soyqırım kimi qiymətləndirməsindən son dərəcə təəssüflənirəm. Tarixi hadisələrin öz məcrasından çıxarıb, ölkəmiz əleyhinə bir kampaniya halına gətirilməsinə icazə verməyəcəyik. Bir italyan Aİ nümayəndəsi çox gözəl bəyanat verib və bildirib ki, biz erməni məsələsi ilə məşğul olmuruq; biz Türkiyənin hər sahədəki mövcud çıxışını izləyirik, biz buna baxarıq.

Qafqazda çərkəzlərin, Krımda tatarların yaşadığı faciələrə ürəyimiz yandığı kimi, ermənilərin də məruz qaldığı çətinlikləri bilir və kədərlənirik. Ermənilər ölkəmizdə olarkən, Osmanlı övladlarını şəhid etdilər. Bu gün erməni məsələsini müzakirə etmək istəyiriksə, hadisələri gerçək şəkildə ortaya qoymağımız lazımdır. Bu da tarixçilərin işidir. Biz bütün arxivlərimizi açırıq. Ermənistan da arxivlərini açsın, sənədlərini ortaya qoysun. Biz Silahlı Qüvvələrimizin arxivlərini də açmağa hazırıq", - Ərdoğan bildirib.