Papa Fransiskin 1915-ci il hadisələri ilə bağlı "soyqırım" ifadəsini işlətməsi rəsmi Ankaranı ABŞ Prezidenti Barak Obama məsələsində hərəkətə keçirib. Ankara Obamanın bu məsələdə Papanın mövqeyini təkrarlayacağından qorxur.

Axar.az Türkiyənin "Hürriyyət" qəzetinə istinadən xəbər verir ki, bu ilin əvvəlindən rəsmi Ankara başda ABŞ olmaqla Qərb ölkələrində erməni diasporu ilə İrəvan rəhbərliyinin "soyqırım" siyasətinə qarşı mübarizə aparır.

Bənzər mübarizəni Vatikanda da aparan Ankara Papanın "soyqırım" ifadəsini işlətməyəcəyinə ümid edirdi. Lakin Papa Fransiskin 1915-ci il hadisələri ilə bağlı "soyqırım" ifadəsini seçməsi Ankarada "Obama Papanın mövqeyini davam etdirərmi" sualını gündəmə gətirib.

Səlahiyyətli bir şəxs isə qəzetə açıqlamasında bunları deyib:

"ABŞ-dakı erməni diasporu Papanı nümunə göstərərək, Obama administrasiyasına ötən illərə nisəbətən daha çox təzyiq edəcək. Biz də başda Vaşinqton səfirliyimiz və qeyri-hökumət təşkilatlarımız olmaqla lazım olanı edirik. ABŞ-ın regiondakı ən önəmli müttəfiqini itirəcək bir mövqe nümayiş etdirəcəyini düşünmək belə istəmirik".

Qeyd edək ki, Obama 7 illik prezidentliyi dövründə ermənilərdən gələn təzyiqlərə baxmayaraq, "erməni soyqırımı" əvəzinə ermənicə "Meds Yeghern" (Böyük fəlakət) ifadəsini işlədib.