ABŞ rəsmilərinə beynəlxalq aləmdə İran əleyhinə təbliğatı və köhnəlmiş metodlara müraciət etməyi dayandırmağı məsləhət görürük.

Axar.az "Tasnim" agentliyinə istinadən xəbər verir ki, bunu İran Xarici İşlər Nazirliyinin sözçüsü Seyid Xətibzadə ABŞ-ın Cənubi Afrikadakı səfiri Lana Marksa sui-qəsd təşkili ilə bağlı yayılan xəbərlərə münasibət bildirərkən söyləyib.

XİN sözçüsü “Politiko” qəzetinin qərəzli şəkildə yalan xəbər yaydığını, ölkəsinin beynəlxalq birliyin məsul üzvü olaraq beynəlxalq diplomatik prinsip və normalara sadiq qaldığını sübut etdiyini bildirib.

ABŞ-ı dövlətlərin ərazi bütövlüyünü pozmaqda ittiham edən Xətibzadə iranlı general Qasım Süleymaninin də qorxaqcasına öldürüldüyünü vurğulayıb.

Qeyd edək ki, "Politiko" qəzeti İran hakimiyyətinin Qasım Süleymaninin qətlinə cavab olaraq ABŞ-ın Cənubi Afrikadakı səfiri Lana Marksa qarşı sui-qəsd təşkil etmək ehtimalını nəzərdən keçirdiyi barədə məlumat yayıb.