Əpl şirkəti sentyabr ayında baş tutan təqdimatda iki yeni planşeti – “Aypad 2020” və “Aypad Air 2020” dünya ictimaiyyətinə nümayiş etdirib.

Axar.az xəbər verir ki, ekran diaqonalını 10,2 düymə qədər böyüdən ilk cihaz ekonomik Aypad seriyasını davam etdirir. Planşet “A12 Bionik” çipseti ilə işləyir. Əpl bu seriyanın “Vindovs” və “Android”dən daha populyar olması ilə fəxr edir.

Digər cihaz – “Aypad Air 2020” isə daha maraqlıdır. Onun xarici görünüşü Pro tipli tabletlərə bənzəyir. Lakin bu, o qədər də önəmli və yeni detal deyil. Belə ki, “A14 Bionik” prosessorunu alan ilk cihaz məhz budur. Sələfindən 30-40 faiz daha sürətlidir. “Aypad Air 2020”nin 10,9 düymlük ekranı var. Face ID yerinə, TouchID-dən istifadə edilir. Planşetdə digər yeni funksiyalar da mövcuddur.

Qeyd edək ki, kiçik planşetin ABŞ-da 329 dollara, “Aypad Air 2020” isə 599 dollara satılması gözlənilir.