Türkiyə Baş naziri Əhməd Davudoğlunun erməni əsilli keçmiş müşaviri Etyen Mahçupyan "Axşam" qəzetindəki bloqunda öz istefasından, qondarma erməni soyqırımından yazıb.

Axar.az xəbər verir ki, Mahçupyan yazısında bildirib ki, onun istefa verməsinə sonuncu dəfə "soyqırım"la bağlı dedikləri təsir göstərə bilər.

Keçmiş müşavir eyni zamanda həmişə baş nazirin qeyri-rəsmi olaraq müşaviri işləməyə hazır olduğunu da bildirib.

Mahçupyanın sözlərinə görə, martın 9-da onun 65 yaşı tamam olub və Türkiyə qanunlarına görə, bu yaşda təqaüdə çıxırlar. Belə olan təqdirdə də o avtomatik olaraq öz vəzifəsindən istefa verib.

Mahçupyan öz yazısında olduqca qalmaqallı ifadələr də işlədib. O, bildirib ki, əgər Türkiyənin baş naziri olsa belə, qondarma soyqırımı tanımayacaq:

"Bu gün baş nazir öz xalqının rifahı və maraqlarına cavabdeh olmalıdır, cəmiyyəti naməlum tunelə aparmalı deyil".