Ermənistan Milli Təhlükəsizlik Xidməti “Dosye Mərkəzi”nin (“Dossier.center” saytı) yayımladığı siyahıda yer alan istənilən fakta qiymət verəcəyini bildirib.

Axar.az xəbər verir ki, bunu Ermənistan Milli Təhlükəsizlik Xidmətinin rəhbəri Argişti Kərəmyan deyib.

“Təbii ki, ilkin araşdırma artıq başlanıb, amma hazırkı anda bununla bağlı heç nə deyə bilmərəm”, – deyə o bildirib.

Qeyd edək ki, Mixail Xodorkovskinin “Dosye Mərkəzi” Rusiyanın Ermənistanda çoxlu sayda agentinin olduğunu və onların Paşinyanı izlədiyini açıqlamışdı. Yayımlanan siyahıda həmçinin Ermənistan Milli Təhlükəsizlik Xidmətinin keçmiş rəhbərləri Georgi Kutoyan, Karlos Petrosyan və Artur Vanetsyanın Kremlə bağlı olduğu haqda iddialar irəli sürülmüşdü.

Xatırladaq ki, analoji siyahı Azərbaycanla bağlı da dərc edilmişdi. Siyahıda “Kremlin maraqları naminə istifadə üçün təklif edilən” adlar açıqlanmışdı.

DTX sözügedən siyahının cəfəngiyyat olduğu haqda rəsmi açıqlama yaydı.