Ukrayna Ali Radasında növbəti qalmaqal yaşanıb.

Axar.az xəbər verir ki, Baş nazir Arseni Yaçenyukun iştirakı ilə keçirilən iclasda deputatlardan birinin sualı gərginliyə səbəb olub.

Ali Radanın deputatı Sergey Rudika Yaçenyuka, "Hörmətli Arseni, bu sual məni həyəcanlandırır. Ukrayna cəmiyyətinin adekvat hissəsinin əksəriyyətini də həyəcanlandırır: Nə vaxtsa Siz könüllü olaraq istefaya gedəcəksiniz?" sualı baş nazirin sərt reaksiyasına səbəb olub:

"Hörmətli xalq deputatı, unutmamağınız üçün qələmi götürün, vərəqə yazın. Siz heç vaxt məni o yoldan döndərə bilməyəcəksiniz. Biz ölkəni dəyişdirəcəyik, biz islahatlar keçirəcəyik, biz hər şeyi edəcəyik. 15 ay əvvəl söz verdim, ölkənin taleyi üçün məsuliyyəti üzərimə götürdüm və mən bu məsuliyyəti qürurla daşıyacağam".

Baş nazirin bu sualı cavablandırdığı vaxt isə Rudika onun yanına gəlib və gərgin dialoq yaşanıb.