Şimali Kipr Türk Cümhuriyyəti prezident seçkisində Mustafa Akıncının qalib gəldiyini elan edib.

Axar.az xəbər verir ki, Şimali Kipr Türk Cümhuriyyətinin Yüksək Seçki Təşkilatının rəhbəri Şəfəq Önəri 64,15% seçicinin iştirak etdiyi seçkilərdə 110 min 60 səsdən 108 min 32 səsin etibarlı sayıldığını açıqlayıb.

Rəsmi məlumata görə, nəticələr bu axşam açıqlanacaq. Akıncı vəzifəsini həftə içində təhvil alacaq. İqtidar partiyası Cümhuriyyətçi Türk Partiyası - Birləşmiş Qüvvələr (CTP-BG) və Sosial Demokratiya Partiyasının dəstəyi ilə ikinci tur seçimlərində qalib gələn Akıncının vəzifə müddəti 5 il olacaq.

Qeyd edək ki, Akıncı 1947-ci il dekabrın 28-də Limasolda doğulub. Orta Şərq Texniki Universitetinin (ODTÜ) Memarlıq fakültəsini bitirib, 1975-ci ildə Kipr Türk Federal Dövləti Qurucu Məclis üzvlüyünə seçilib. Akıncı 1999-2001-ci illər arasında baş nazir köməkçisi və turizm naziri vəzifəsində çalışıb.

Evlidir, üç övladı var.