Nigeriya ordusu Boko Haram terror təşkilatının sığındığı Sambisa meşəsindən yüzlərlə qadını xilas etdiyini açıqlayıb.

Axar.az xəbər verir ki, ordunun Tvitter hesabından verilən açıqlamaya görə, terror təşkilatının əlindən 200 qız uşağı və 93 qadın geri alınıb.

Ordunun açıqlamasında bu cümlələr yer alıb: "Bu gün qruplarımız Sambisa meşəsində 200 qız uşağı və 93 qadını xilas edib. Ancaq Çibokda qaçırılan qızların bunların arasında olub-olmadığını bilmirik".

Xilas edilən şəxslərin tibbi müayinədən keçirildiyi barədə məlumat verilən açıqlamada hərbi qrupların Sambisa meşəsindəki əməliyyatda Boko Harama aid 3 düşərgəni ələ keçirdiyi qeyd edilib.