İŞİD terrorçuları girov götürdükləri yezidi qızları seks köləsi kimi alıb-satır, fiziki və cinsi təcavüz edirlər.

Axar.az Türkiyənin "Hürriyət" qəzetinə istinadən xəbər verir ki, İŞİD-in girov götürdüyü yezidi qızlarından biri də İraqın şimalındakı Herdan kəndində yaşayan 19 yaşlı Daliadır.

İŞİD-in əlində doqquz ay qalan Dalia aprelin 4-də azadlığına qovuşub. Onun girovluqda yaşadıqları isə sözün əsil mənasında vəhşilikdir. Hər cür təcavüzə məruz qalan, işgəncə edilən Dalia 7 dəfə İŞİD terrorçuları tərəfindən alınıb və satılıb.

Onun başına gələn hadisələri təqdim edirik:

"Liseydə oxuyurdum və sonuncu sinifə keçmişdim. 2014-cü ilin 3 avqust səhəri yuxudan oyandığımda İŞİD terrorçularının kəndimizə hücum etdiyini və hər kəsin qaçmağa çalışdığını gördüm. Bizi tutdular və hamımızı bir yerə yığıb "ya müsəlman olacaqsınız, ya da öləcəksiniz",- dedilər. Hamımız qorxduğumuz üçün onlarla razılaşdıq. Buna baxmayaraq, kənddəki kişilərin hamısını yığıb apardılar və bir daha onlardan xəbər ala bilmədik.

Qadınları gənc və yaşlı olmaqla iki qrupa böldülər. Gənc qızları uşaqlarla birlikdə Telafer (Mosul vilayəti) şəhərinə apardılar. Bizi Telaferdə məktəbə yerləşdirdilər. Ora qul bazarı idi. Hər gün İŞİD əmrləri gəlib, aramızdan birini seçib pulla alırdı. Aralarında türklər, almanlar və çeçenlər də vardı. Əsasən, 12-13 yaşlarındakı qızları alırdılar. Terrorçuların arasından telaferli bir türkman məni alıb evinə apardı. Onun arvadı və üç uşağı vardı.

Beş ay onun yanında qaldım. Bir gün Əbu Mustafa adlı İŞİD əmiri gəlib məni güclə onun əlindən aldı və Aymen adlı çeçen İŞİD əmirinə hədiyyə etdi. Aymen mənə təcavüz etməzdən əvvəl saçımdan tutub, başımı içi neftlə dolu vedrəyə saldı. Çeçen terrorçu mənə "siz çox pissiniz, biz sizi belə təmizləyirik",- dedi. Sonra məni evdən çıxmağa qoymadı və 3 gün təcavüz etdi. Aymen bundan sonra məni Əbu Saleh adlı başqa bir İŞİD-çinin əlində olan yezidi qızla dəyişdi. Əbu Saleh bir gecə mənə təcəavüz etdikdən sonra Aymenə geri qaytardı. 10 gün sonra məni Aymenə verən Əbu Mustafa qayıdıb gəldi. "Mən bu qızı sənə özünə nökər etməyin üçün verdim, əgər kimləsə dəyişəcəksənsə geri qaytar",- dedi və məni Aymendən aldı. Bir ay Əbu Mustafanın evində qaldım və sonra İzam adlı mosulluya satıldım.

O da mənə təcavüz etdikdən sonra Mosuldan olan İŞİD döyüşçüsünə satdı. 15 gün onunla qaldım, sonra o da məni telaferli İŞİD-ə işləyən həkimə satdı. O, hər gecə məni İŞİD qərargahına aparıb təcavüz edir və səhər açılanda anamın yanına aparırdı. Bir dəfə artıq ölməyi gözə alıb "gəlmirəm" dedim. Kəndi idarə edən İŞİD liderlərindən biri bunu eşitdi və ona hər şeyi danışdım. O, məni həkimin əlindən aldı və kərküklü ərəbə satdı. Sən demə, məni alan ərəb kürdlərlə birgə iş görürmüş. O məni kürdlərə vermək üçün aldığını dedi. Məni alan ərəblə əvvəlcə Kərbəlaya, sonra Bağdada, daha sonra isə Zahoya getdik. Zahoda məni kürd polislərə təslim etdi. Zahoda işləyən atam məni polislərdən götürməyə gəldi. Atamı ilk gördüyümdə uçduğumu zənn etdim. O da ağlamağa başladı. O qədər sevindim ki, həmin an yaşadığım hər şeyi unutmuş kimi oldum..."