"Ukraynada insanlar müharibəyə görə dözür, seçdikləri prezidentə əlavə problemlər yaratmaq istəmirlər".

Axar.az xəbər verir ki, bu barədə hazırda Kiyevdə olan "Atlas" Araşdırmalar Mərkəzinin rəhbəri, politoloq Elxan Şahinoğlu yazır. Ukraynadakı real vəziyyəti şərh edən politoloq bildirib ki, ölkədəki mövcud iqtisadi durum islahatların aparılmasını zəruri edir:

"4-5 ay öncə ilə müqayisədə Kiyevdə həyat şərtlərinin ağırlaşdığını müşahidə etdim. Maydan əhval-ruhiyyəsi arxada qalıb, biri mərkəzi meydanda meqafonla nəsə qışqırır, fikir verən də yoxdur. İnsanlar yorulur, gündəlik tələbatlarının ödənilməsi haqqında düşünürlər. Maaş az, inflyasiya və qiymətlər isə yüksəkdir. İnsanlar müharibəyə görə dözürlər, özlərinin seçdiyi prezidentə əlavə problemlər yaratmaq istəmirlər. Ancaq zəruri iqtisadi islahatlar aparılmasa, insanların dözümünün sonu gələ bilər. Hökuməti də qınamalı deyil, vəziyyətin dəyişməsini tələb edən iqtisadi islahatlar qeyri-populyar addımların atılmasını diqtə edir ki, bu özü ilə sosial gərginlik gətirəcək. Prezident və baş nazir riskə getmək istəmirlər".