Dağıstan Prezidenti Ramazan Abdulatipov Ramzan Kadırova dəstək olduğunu bildirib.

Axar.az xəbər verir ki, bu barədə informasiyanı Rusiya mətbuatı yayıb.

Prezident Rusiyanın digər bölgələrindən Çeçenistana gəlib, burada əməliyyat keçirən şəxslərin öldürülməsi haqqında Kadırovun verdiyi əmrin doğru olduğunu bildirib:

"Niyə naməlum yerlərdən, naməlum qruplar buraya gəlsin? Əgər prezident mənəmsə, siz öncə mənə xəbər verin. Mən axı haradan bilim ki, onlar bizim adamlardır, ya yox. Əgər belə deyilsə, onda mən nəyə görə burada otururam? Mən bura dövlət rəhbəri tərəfindən göndərilmişəm. Bizi görməzliyə vurmaq qəbuledilməzdir".

Qeyd edək ki, Ramzan Kadırovla Ramazan Abdulatipov arasında münasibətlər o qədər ürəkaçan səviyyədə deyil. Bəzi mənbələr buna əsas səbəb kimi Kadırovun Dağıstana qarşı torpaq iddiasının olmasını göstərirlər. Abdulatipova gəlincə isə o, Kadırovun Şimali Qafqazdakı hegemoniyasını qəbul etmir və Moskvadan Dağıstanın tabeliyinə xüsusi ordu bölmələri verməyini istəyir.