20 vəkil haqqında açılan istintaqa CHP millət vəkili Mahmud Tanal və Hakan Şükür də daxil edilib.

Axar.az "A Haber"ə istinadən xəbər verir ki, hakim Mətin Özçelik və Mustafa Başerə təzyiq etdikləri iddia olunan 20 vəkil haqqında aparılan istintaqın qaranlıq məqamları üzə çıxıb.

"Mütəşəkkil şəkildə səlahiyyətli şəxslərə təzyiq" və "Təşkilat üzvü olmaq" iddiası ilə başlanan istintaqda kamera qeydləri araşdırılıb. Bu zaman Mahmud Tanal ilə Hakan Şükürün hadisə baş verən gecə polis bölməsinə gəldiyi aşkar olunub.

Hər iki millət vəkili haqqında istintaq materiallarının Türkiyə Böyük Millət Məclisinə təqdim ediləcəyi bildirilir.

Xatırladaq ki, aprelin 25-də "Paralel dövlət"in 75 üzvünü məhkəmə qərarı ilə azad etmək istəyən 20 vəkil prokuror Orxan Güldikərin otağına girib. Məhkəmənin həmin şəxslər barəsində qərar çıxardığını deyən vəkillər prokurordan bunu təsdiq etməsini tələb ediblər.