Erməni Apostol Kilsəsi Türkiyə Konstitusiya Məhkəməsinə müraciət edərək, Kilikiya monastırının onlara qaytarılmasını istəyib.

Axar.az xəbər verir ki, bu barədə informasiyanı "Nyu York Tayms" qəzeti yayıb. Qəzetin məlumatına görə, ermənilər monastırın mülkiyyət haqqının ermənilərə verilməsini tələb edir:

"Kilikiya krallığı ermənilərin tarixində önəmli yer tutur. Ona görə də buranın qaytarılması maliyyə ilə yanaşı simvolik baxımdan da önəmlidir. Hazırda Kilikiya Katolikosluğu Ermənistanda Eçmiədzinə bağlı ən yüksək dərəcəli məqam hesab edilir".

Qəzet həmçinin Kilikiya katolikosu I Aramın bütün ermənilər adından məhkəməyə müraciət etdiyini bildirir. Erməniləri bu işdə əslən iranlı vəkil Payam Akhavan müdafiə edəcək.

Kilikiya monastırı Türkiyənin Adana şəhərində yerləşir. 1930-cu ilə qədər katolikosluğun mərkəzi Adananın Kozan vilayəti olub. Sonradan bu dini mərkəz Livanın Antelias şəhərinə köçüb.

Keçən ilin sentyabrında Kilikiya katolikosluğunun rəhbəri Aram "erməni soyqırımı" öncəsi Türkiyədən bu monastırı tələb edəcəklərini açıqlamışdı.