Ümid edirəm ki, bütün partiyalar Gürcüstan seçicilərinə hörmət nümayiş etdirib, çoxpartiyalı effektiv parlament yaradacaq.

Axar.az xəbər verir ki, bunu Gürcüstan Prezidenti Salome Zurabişvili deyib.

Qeyd edək ki, Gürcüstanda majoritar seçki dairələrində parlament seçkisinin ikinci mərhələsi başlayıb. Proporsional dairələr üzrə keçirilən seçkidə artıq Gürcü Arzusu Partiyası qalib gəlib. Ümumilikdə parlamentdə 9 partiya və blok daxil olub.

Müxalifət seçkinin nəticələrini qəbul etmir. Onlara görə, seçkidə saxtakarlığa yol verilib və onlar səslərin yenidən hesablanmasını istəyirlər. Bununla belə ABŞ artıq seçkinin qalibi olaraq Gürcü Arzusunu tanıdığını elan edib və müxalifəti parlamentə getməyə səsləyib.

Müxalifətlə iqtidar arasında problemin həlli üçün ABŞ Dövlət katibi Mayk Pompeo Tiflisdə özünün köməkçisini qoyaraq geri dönmüşdü.