Ermənistan parlamenti Çiçəklənən Ermənistan Partiyasının sədri Qagik Çarukyanın mandatının əlindən alınması üçün Konstitusiya Məhkəməsinə müraciət edəcək.

Axar.az xəbər verir ki, bu barədə məlumat parlamentin saytında yer alıb.

Qeyd edək ki, noyabrın 16-da Çarukyanın mandatının əlindən alınması məsələsinin parlamentdə müzakirə edilməsi planlaşdırılsa da, iclas sonradan təxirə salınmışdı.

Çarukyan vergidən yayınmaqda, seçicilərin səsini satın almaqda və böyük torpaq sahələrini mənimsəməkdə ittiham olunub. İyunda onun evində axtarış aparılıb, sonra isə onun deputat toxunulmazlığı ləğv edilib. 25 sentyabrda həbs edilən Çarukyan 22 oktyabrda 200 min dollar girov qarşılığında azad olunub.

Bundan sonra Çarukyan hərbi dəstə yaradaraq Qarabağda döyüşlərə qoşulduğunu bildirsə də, Paşinyan bunu təkzib edib və Çarukyanın dəstələrinin böyük hissəsinin İrəvanda qaldığını, digər hissəsinin isə Şuşaya Azərbaycan ordusunun yaxınlaşdığını eşidən kimi qaçdığını bildirib.