Erməni ziyalıları yürüş keçirərək, bu dəfə ABŞ səfirliyinə məktub göndəriblər.

Axar.az xəbər verir ki, bu barədə “Sputnik Armenia” məlumat yayıb.

Bu, sayca 3-cü yürüş və buna uyğun olaraq 3-cü dəfə ünvanlanan məktubdur. Əvvəl Rusiya, sonra Fransa, indi də ABŞ — Ermənistanın çox sevdiyi Minsk Qrupunun həmsədrləri ölkənin daha bir problemini həll etməlidirlər.

Səfirliklərin önündə keçirilən aksiyaların məqsədi erməni əsir və ölənlərin qaytarılmasıdır, daha doğrusu, buna yardım çağırışlarıdır. Bu baxımdan həmin “səfirə məktub” aksiyası məntiqli sual doğurur. Əsirləri səfirlərmi qaytaracaq?

O səfirlər ki, onların Ermənistanda olma məqsədi yalnız öz ölkəsini təmsil etməkdən ibarətdir. Əsir və ölənlərin qaytarılması Ermənistan hökumətinin funksiyasıdır, hətta birbaşa Nikol Paşinyanın öhdəliyidir. Məsələnin həlli mexanizmi hökumət içində ola-ola səfirliyə məktub göndərməyin mənası nədir? Sadə insan psixologiyası: Başqasının sənin işini görməsi daha asandır axı.

Nikol Paşinyanla konflikt yaşamaqdan çəkinən, ölkədə baş verənlərdən yan keçmək istəyən ziyalılar problemi ölkədaxili siyasətə toxunmadanmı həll edə biləcəklər?

Qəribə vəziyyətdir.