Amerika Erməniləri Milli Komitəsi (ANCA) Dövlət Departamentini ABŞ-ın Ermənistandakı səfiri Linn Treysini geri çağırmağa səsləyib.

Axar.az xəbər verir ki, ANCA, həmçinin Bayden administrasiyasını ABŞ-Ermənistan münasibətlərini gücləndirməyə və İrəvana yeni səfir təyin etməyə çağırıb.

“ANCA istəyir ki, Amerikanın Ermənistandakı hər səfiri uğurlu olsun. Təəssüf ki, Amerikaya İrəvanda güclü səfir lazım olanda ölkəmizin nümayəndəsi bizi məyus etdi. Linn Treysi hər məsələdə uğursuzluğa düçar oldu.

Linn Treysi milli böhran zamanı ermənilərə nə maddi, nə də mənəvi kömək edə bildi. ABŞ-Ermənistan münasibətləri Treysinin missiyasının bitdiyi zamanda onun gəlişi dövrüylə müqayisədə daha pis olub”, – deyə ANCA bildirib.

Qeyd edək ki, Linn Treysi ABŞ-ın ən təcrübəli diplomatlarından biridir. O, Ermənistana gəlməzdən öncə Qırğızıstan, Türkmənistan, Qazaxıstan, Əfqanıstan, Pakistan, Gürcüstan və Rusiyada çalışıb.