Ermənistanın parlamentdənkənar müxalifəti qərar qəbul edib ki, baş nazir Nikol Paşinyanı əvəz edən şəxs 3-4 ay hakimiyyətdə qalacaq.

Axar.az xəbər verir ki, bu barədə Ermənistanın "Joxovurd" qəzeti məqalə dərc edib.

“Bu dövr Ermənistanda növbədənkənar parlament seçkilərinin təşkili üçün istifadə edilməli idi. 16 müxalif partiyanın “A” planına əsasən, aprelin əvvəlinədək Ermənistan hökumətində yeni seçkilərin keçirilməsi nəzərdə tutulurdu. Ancaq bizim mənbələrimizin sözlərinə görə, müxalifət tərəfindən baş nazir vəzifəsinə irəli sürülmüş namizəd Vazgen Manukyanla görüş zamanı aydın olub ki, bu qədər az vaxt ərzində Ermənistanda sabitlik yaradıb, seçkilər keçirmək mümkün deyil. Qərar qəbul edilib ki, əgər Ermənistanda milli həmrəylik hökuməti yaradılsa, baş nazir bir ildən sonra seçkiləri təşkil etməlidir. Vazgen Manukyan isə rəhbərlik etdiyi Milli Demokratiya İttifaqı Partiyasından imtina etməli və ümumiyyətlə, parlament seçkilərində iştirak etməməlidir. Bu gün Azadlıq meydanında ümumdövlət mitinqi zamanı Vazgen Manukyan hazırladığı yeni dövlət mexanizmlərinə dair ətraflı məlumat verməlidir”, - materialda bildirilib.