Gələcək hakim koalisiya partiyaları – sosial-demokratlar, xristian demokratlar və "ANO" ("HƏ") artıq gələcək Nazirlər Kabinetinin proqramı və şəxsi heyəti barədə razılıq əldə ediblər.

Milad və Yeni il bayramlarından sonra yanvarın 6-da koalisiya müqaviləsinin təntənəli surətdə imzalanması mərasimi olacaq.

Prezident Zeman Nazirlər Kabinetinin şəxsi heyətinə etiraz etməsə, yanvarın ortalarında yeni hökumət təyin ediləcək. Lakin Miloş Zeman sosial-demokrat Lubomir Zaoralekin xarici işlər naziri vəzifəsinə təyin olunması ilə razılaşmadığını artıq qeyri-rəsmi şəkildə bildirib. Amma hüquqşünasların əksəriyyəti belə bir fakta diqqəti çəkir ki, Konstitusiyaya görə, Prezident mühüm səbəb olmadan hər hansı bir nazirin təyin edilməsinə etiraz edə bilməz. Yeni hökumətin formalaşdırılması haqqında danışıqları yeni baş nazir olacaq sosial-demokratların lideri Boquslav Sobotka aparıb. (AzərTac)