Bir neçə ay öncə Tiflis yaxınlığında qətlə yetirilmiş Tamar Baçaliaşvilinin ailəsi etiraz aksiyaları keçirməyə hazırlaşır.

Axar.az xəbər verir ki, bu məlumatı Teona Tamazaşvili öz Feysbuk səhifəsində paylaşıb. O, aksiyanın yerli vaxtla 15:00-da Baş Prokurorluq önündə keçiriləcəyini bildirib.

Qeyd edək ki, 23 yaşlı IT mütəxəssisi olan Baçaliaşvili 18 iyunda yoxa çıxıb. Onun cəsədi dörd gün sonra öz maşınında aşkarlanıb. Ailəsinin bütün israrlarına rəğmən Gürcüstan prokurorluğu Baçaliaşvilinin ölümü ilə bağlı istintaqı 17 dekabrda dayandırıb. Prokurorluq Baçaliaşviliyə qarşı cinayətin işlənmədiyini, intiharla həyatına son qoyduğunu bildirib.

Baçaliaşvili ilə bağlı məsələni önəmli edən məqam ailəsinin 31 avqustda açıqlama ilə çıxış etməsi olub. Belə ki, Tamarın anası qızının Ermənistana Qarabağa silah tədarük etməsi üçün yardım edilməsinə dair faktları aşkarladığına görə öldürüldüyünü iddia edib. O, bu tədarükdə Gürcüstanın üç yüksək vəzifəli məmurunun yaxından iştirak etdiyini və qızının bunu bildiyini deyib.